Приидите, людие Божии, / лику святых и Ангелом составим духовное торжество, / в нем бо Церковь Земная Божественно с Небесною ликовствует: / ныне верный делатель вертограда Приснодевы Богородицы / во Иерусалим Горний приемлется / и, яко муж желаний, / у Престола Божия славою и честию венчается, / радость спасения нам предвозвещает, / егда горением любве его ко Господу воспламенимся. (Дважды)

Приидите, Матере Божия сподвижницы / и постнического жития ревнителие, / со пустыннолюбцы Горы Афонския Трапезы Божестненныя сопричастницы будем. / Ныне Пречистая Матерь Божия / Силуана, подвижника нова и предивна, / егоже диавол искаше поглотити, спасла есть, / и Церкви Небесней на радость приведе, / и, яко фимиам благовонный, / молитвенника тепла за нас у Престола Божия постави, / венцем лепоты неувядаемыя увенчана. (Дважды)

Приидите, монашеского подвига щедролюбцы, / востаните, уневестившиися Христу, / да Силуана богомудреннаго, / подвигом равноангельным украшена, узрим / и сему, козни вражия победившему, / радующеся, возопиим: / Радуйся, родителей благочестивых плод целомудренныя чистоты; / радуйся, облагодатствованный щедротами Божественныя доброты. / Радуйся, веры чистыя и незлобия дивное воплощение; / радуйся, постом и молитвою стяжавый Христово всепрощение.

О, преблаженне отче Силуане, / Небеснаго Утешителя в сердце своем носителю прединный / и пламени любве Божия сосуде неистощимый, / тебе припадающе, вопием: / Егоже всем сердцем возлюбил еси, / Егоже ради в Горе Афонстей молитвою слезною за мир сраспинался еси, / не престай и ныне умоляти / Церкви Святей от зол избавление даровати, людем же, греховными соблазны обуреваемым, / мир и велию милость.

Слава, глас 6:

Веселися и радуйся, Горо Святая, / Вратарницы Небесная омофором присно украшаемая; / Церковь Российская, взыграй ликовствующи. / Ныне христолюбивии людие, / от восток солнца до запад, / вечери Агнца Божия приуготовляются, / Силуана богомудреннаго доброты порфирою украшаются. / С ними же и мы, сему братолюбия учителю, / память празднующе, сладце вопием: / Радуйся, севера благодатное сияние, / в вертограде Афонстем Святыя Руси светлое отражение; / радуйся, ангеле молитвы слезныя, / Богу приносимыя о всей вселенней. / Моли о нас Господа, братолюбием оскудевающих.

И ныне, праздника.

Праведницы во веки живут, и в Господе мзда их, и попечение их у Вышняго. / Сего ради приимут Царствие благолепия и венец доброты от руки Господни, / зане десницею покрыет я и мышцею защитит их. / Приимет всеоружие рвение свое, и вооружит тварь в месть врагом. / Облечется в броня правды и возложит шлем суд нелицемерен. / Приимет щит непобедимый преподобие, / поострит же напрасный гнев во оружие, / споборет же с ним мир на безумныя. / Пойдут праволучныя стрелы молниины / и, яко от благокругла лука облаков, на намерение полетят, / и от камнеметныя ярости исполнь падут грады. / Вознегодует на них вода морская, реки же потопят я нагло. / Сопротив станет им дух силы, и, яко вихор, развеет их, / и опустошит всю землю беззаконие, и злодейство превратит престолы сильных. / Слышите убо, царие, и разумейте, навыкните, судии концев земли. / Внушите держащий множества, и гордящиися о народех язык, / яко дана есть от Господа держава вам и сила от Вышняго.

Праведных души в руце Божией, и не прикоснется им мука. / Непщевани быша во очесех безумных умрети, и вменися озлобление исход их, / и еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. / И вмале наказани бывше, великими благодетельствовани будут, / яко Бог искуси я и обрете их достойны Себе. / Яко злато в горниле, искуси их и, яко всеплодие жертвенное, прият я. / И во время посещения их возсияют и, яко искры по стеблию, потекут. / Судят языком, и обладают людьми, и воцарится Господь в них во веки. / Надеющиися Нань разумеют истину, и вернии в любви пребудут Ему, / яко благодать и милость в преподобных Его и Посещение во избранных Его.

На стиховне, стихиры, глас 2:

Подобен: Егда от древа:

Светом невечерним Святыя Троицы просвещен, / нощь житейскую без преткновения прешел еси, / богомудре Силуане, / видении Божественными возвышаяся, / во дворех Бога Вышняго вселился еси. / Темже и нас наследники Того соделай, / святую твою память почитающих.

Стих: Честна пред Господем смерть преподобных Его.

Земная вся оставив, / богатство и славу яко прах вменив, / Гору Святую слезами твоими оросил еси, / и невозвратным желанием Единому Богу приближаяся, / Сему ангельски послужил еси. / Егоже моли, преподобне, / в книзе жизни написатися почитающим тя.

Стих: Блажен муж, бояйся Господа, в заповедех Его восхощет зело.

Не престай моляся, отче Силуане, / о неключимых рабех твоих, / ихже богомудренным твоим житием просветивый, / Богу привел еси, / да вси честное преставление твое светло почитаем.

Слава, глас тойже:

О всеблаженне отче Силуане, / богатства некрадомаго стяжателю премудрый: / молитву яко хлеб, слезы яко елей вменяяй, / и якоже Павел богомудрый, / о Кресте Господнем радуяся, / Солнцу Правды горением любве утреневал еси; / стяжанию Духа Святаго нас научаеши прилежно.

И ныне, праздника.

Серафимския любве ко Господу пламенный ревнителю / и Иеремии, о народе плачущему, / усердный подражателю, / всеблаженне отче Силуане, / ты зову Матере Господа Сил внемляй, / змия греховнаго мужемудренно изрыгнул еси / и в Гору Афонскую от суеты мира удалился еси, / идеже в трудех и молитвах со слезами / блпшдать Святаго Духа обильно стяжа. / Еюже сердца наша воспламени / и с тобою умильно взывати укрепи: / Господи мой, Жизнь моя и Радости Святая, / спаси мир и нас от всяких лютых.

На "Бог Господь" тропарь праздника дважды.

Слава, святому, И ныне, праздника.

По 1-м стихословии седален, глас 5:

Горы и холми взыграйте, пустыня Афонская возвеселися, днесь бо обитель целителя безсребреннаго, утренюющи, песнь приносит Владыце: Воспойте Господеви песнь нову, яко дивна сотвори Господь, возведе от нас к Едему Горнему молитвенника за мир неусыпна, Силуана богомудраго.

Слава, и ныне, праздника, или Богородичен, глас тойже:

Потребися всяка печаль Рождеством Твоим, и отъят Господь рыдание, и плач, и слезу всяку от лица земнородных, Чистая Богородице: о Тебе, Неискусобрачная, и мы радости исполняемся.

По 2-м стихословии седален, глас тойже:

Погребл еси страстей востание умерщвлением плоти, преподобне отче: радость жизни безконечныя по смерти приял еси, темже днесь Христова Церковь празднует твою досточудную память, отцев Афонских украшение.

Слава, и ныне, праздника, или Богородичен:

Оружием нас сладости греховныя уязвленных и лежащих в ранах неисцельных, Пречистая Богородице, не презри, но исцели копием и Кровию Распеншагося за нас Сына Твоего и Бога нашего.

По полиелеи седален, глас 1:

Подобен: Гроб Твой, Спасе:

От юности на гору безстрастия возшел еси и яко ветвь масличная, корене земли Российския, в пустыни Афонстей житием непорочным процвел еси, предивне отче Силуане, и яко новым тайновидец, благодать богоедения стяжал еси и дерзновением Илииным ко Господу взывал еси: Господи, спаси мир, злом обуреваемый.

Слава, и ныне, праздника, или Богородичен, глас тойже:

Настави нас на путь покаяния, уклоншихся к безпутиям зол, и Преблагаго прогневавших Господа, Неискусобрачная Преблагословенная Мати, мира всего и Горы Афонския Надеждо непререкаемая.

Степенна, 1-й антифон 4-го гласа.

Прокимен, глас 4: Честна пред Господем смерть преподобных Его.

Стих: Что воздам Господеви о всех, яже воздаде ми?

Но 50-м псалме стихира, глас 6:

Преподобие отче Силуане, / во всю землю изыде вещание наставлений твоих; / тем на Небесех обрел еси мзду трудов твоих, / демонския погубил еси полки / и Ангельских достигл еси ликов, / ихже житию без порока поревновал еси, / дерзновение имея ко Христу Богу, / мир испроси душам нашим и велию милость.

Канон праздника на 8 и святому на 6.

Ирмос: Спасителю Богу, в мори люди немокрыми ногами наставльшему и фараона со всевоинством потопльшему, Тому Единому поим, яко прославися.

Припев: Преподобне отче Силуане, моли Бога о нас.

Ума чистотою зову Матере Господа Сил внемляй, змия, грех пораждающаго, изрыгнул еси, и взыграся дух твой о Бозе, Спасе твоем, 6оголюбиве отче Силуане, Егоже моли о чтущих память твою.

К тебе, крест твой вземшему и на гору безстрастия возшедшему, припадающе молимся, всеблаженне: воспламени сердца наша ко всех любящему Богу, пламенем любве твоея, в горении неугасающем.

Егоже возлюби душа твоя, Сему уверился еси и к Нему Единому прилепился еси, боголюбче, и сице искусителя злолукаваго души твоея покорил еси: трудом, бдением, смирением и слезною молитвою посрамляя.

Слава: Господи сил, освящаяй всякаго человека, грядущаго в мир, даждь слово хваления устом моим, да превознесу Трисвятое имя Твое, дивно во святых Твоих почивающее, с ними же и Силуан, возлюбленный Твой, молит Тя о душах наших.

И ныне, богородичен: Скорбных наведения обуревают убогую мою душу, и напастей облацы мое покрывают сердце, Богоневесто; но Свет рождшая Божественный и Превечный, возсияй мне свет радости, молитвами Силуана, угодника Твоего.

Ирмос: Силою Креста Твоего, Христе, утверди мое помышление, во еже пети и славити тридневное Твое Воскресение.

Кто исповесть страдания души твоея, преподобне Силуане, егда дух злобы поднебесныя претяше ти, от Господа удалити душу твою зложелаше? Сетей сего лукаваго избави и нас, молитвенниче о всей вселенней.

Силою терпения и красотою смирения душа твоя, всеблаженне, храмина Духу Святому устройся, сего ради взывал еси: о, людие, творение Божие, познайте Творца, и любовию к Нему прилепитеся.

Источник радостей твоих и средоточие мыслей твоих имя Бога Вышняго бысть, отче Силуане; к Нему прилепитися и в Нем утвердитися молитвами твоими помози нам, к тебе прибегающим.

Слава: Господи, Господи, даруй силу Твоея благодати, да познают Тебе вси людие Духом Святым; взываем к Тебе умильно якоже возлюбленный Твой, любовию к Тебе распаляемый Силуан предивный.

И ныне, Богородичен: Не умолчу вопити яснейше величия Твоя: аще бо не Ты, Отроковице, всегда предстояла молящи о мне Сына Твоего, кто бы толикия бури и лютых бед избавил мя?

Седален, глас 4:

Жаждею по Бозе возревновав, отче наш Силуане, землю отеческую оставил еси и со пустыннолюбцы Горы Афонския длани твоя поработати Господеви всеусерднейше распростерл еси. Идеже равноангельными труды твоими вертоград Владычицы мира преукрасил еси и, яко миро благовонное, Церкве Вселенстей возблагоухал еси, лозо винограда новаго, духом Святым облагодатствованная.

Слава, и ныне, Богородичен, глас тойже:

Несть исчислити возможно величия Твоя, Богородице, ниже изрещи неизследимую паче ума глубину чудес Твоих, совершаемых присно, любовию Тя чтущим и верою поклоняющимся, яко воистину Бога Рождшей.

Ирмос: Услышах слух силы Креста, яко рай отверзеся им, и возопих: слава силе Твоей, Господи.

Яко пчела трудрлюбная, постом и молитвою к Богу прилежал еси и Богородицу Пречистую мир не оставляти слезно умолял еси, отче Преподобне, не престай и ныне о нас молитися, яко имаши дерзновение велие.

Кладязь новый благодати неисчерпаемыя в Горе Афонстей явился еси, всеблаженне, из негоже, паче меда и сота, сладость любве Христовы Духом Святым источается, еюже в горести греховней услади сердца наша.

Господу рекшу: идеже есть сокровище ваше, ту будет и сердце ваше, благоволи убо, о всеблаженне, с тобою Тому взывати: Господи, Духом Твоим Святым даждь сердцу моему жажду, да никогдаже Тобою насыщуся.

Слава: Яко жертву благовонную и непорочную, принеси молитвы Твои за ны ко Пресвятей Троице, преподобне отче наш, и милости испроси ненавидящим и враждующим на нас, и их, и нас избави от всякия скорби и печали.

И ныне, Богородичен: Тя Чистую, Тя Деву Нескверную, Едину имам стену необоримую, прибежище, покров крепок, оружие спасения; не презри мене блуднаго, Надеждо ненадеемых, немощствующих Помоще, Радосте оскорбляемых и Заступление.

Ирмос: Утренююще вопием Ти, Господи, спаси ны, Ты бо еси Бог наш, разве бо Тебе иного не знаем.

Ты, Господи, создал мя еси и Святым Крещением просветил мя еси, Ты прощаеши грехи моя и даруеши причащатися Тела Твоего и Крове; даруй ми силу всегда пребывати в Тебе; Силуаново рыдание приношу Ти, Боже наш.

Ума моего омрачение и страстей телесных обуревание твоими молитвами, всеблаженне, просвети и утиши, якоже дерзнул еси укротити волны морския, не терпя видети рыбари гибельными ветры обуреваемы.

Недостойными усты приносимое тебе убогое хваление наше, преподобне, не презри, но приими, и воспевающих память твою молитвою посети, бед и напастей и вечнаго мучения избави, да не постыдимся, на тя уповающе.

Слава: Якоже горлица пустыннолюбная, от стражи утренния до нощи воспевати Троицу Единосущную и Нераздельную со пустыннолюбцы Горы Святыя прилежал еси, отче Силуане, умилостивления мертвым, живым и грядущим ходатайствуя.

И ныне, Богородичен: Кий дар благодарения принесу Ти, Богородице, яко насладихся Твоих дарований и Твоея безмерныя благости? Темже убо песнословлю и величаю Твою неизреченную ко мне милость.

Ирмос: Обыде мя бездна, гроб мне кит бысть: аз же воззопих к Тебе, Человеколюбцу, и спасе мя десница Твоя, Господи.

Святителие и священницы, иноцы и вси людие, радующеся, прославите Бога и Пречистую Матерь Его, кадило новое - молитву чистую, Силуана, пламенем Духа Святаго горяща, у Престола Небеснаго за нас приявших.

Возвеселися, Горо Афонская, со пустыннолюбцы, твоими, и во псалмех, и пениих, и песнех духовных воскликни Богу: да угоден будет пред лицем Твоим верный слуга Твой, егоже молитвами благодать новая Церкви Святей даровася.

Приидите, вси вернии, со пустыннолюбцы Горы Святыя, память праведнаго с похвалами почтим взывающе: возносите Господа Бога нашего, и покланяйтеся в Горе Святей Его, дивно во святых Своих почивающему.

Слава: Боже, кто уподобится Тебе? Ты Един Вышний по всей земли. Мы же равноангельному смирению раба Твоего внемлюще, образу и подобию Твоему Духом Святым упование имамы обновитися.

И ныне, Богородичен: Не скрыю глубины Твоих щедрот, и тока безмерных чудес, и источника приснотекущаго воистину еже ко мне милости Твоея, Богородице: но всем исповедую, и вопию, и вещаю.

Смиренномудрия исповедниче предивный / и человеколюбия Духом Святым согреваемая доброто, / Богу возлюбленне Силуане, / о подвизе твоем Церковь Российская радуется, / иноцы же Горы Афонския и вси христианстии людие, / веселящеся, сыновнею любовию к Богу устремляются. / Егоже моли о нас, равноангельне боговедче, во еже спастися нам, в горении любве тебе подражающим.

Имея богатство благодати, во еже духом на Небеса возведену быти, воистину, радости неизреченныя сподобился еси, отче преблаженне Силуане. Егда бо, вне образов мира, в созерцании безмерно любящаго Христа Бога Лице видети сподобился еси, тогда Духом Святым укрепляем, в вертограде Преблагословенныя Богоматере Тому всеусерднейше послужил еси. Егоже моли, равноангельне боговедче, во еже спастися нам, в горении любве тебе подражающим.

Ирмос: В пещи огненней песнословцы спасый отроки, благословен Бог отец наших.

Иго благое, бремя легкое Христа Спаса взем, и ветрилом Духа Святаго, в страсе Божественнем, к пристанищу благоотишному корабль душевный твой управил еси, отче Силуане, монахом, в подвизе изнемогающим, образе предивный.

Како не дивимся смирению и человеколюбию твоему, Силуане предобре, видяще тя слезы источающа? И о сущих во аде и нераскаянных грешницех рыданьми сраспинающася, врагом же своим прощения просяща, всепрощению Христову подражающа.

Псаломски восклицая: видена быша шествия Твоя, Боже, шествия Бога моего и Царя, Иже во святем, Сего, воистину, в лице отца духовнаго Авраамия зрети сподобился еси, чтити наставники наша благодатне нас наставляя, Силуане боговедче.

Слава: Образ добродетельных деяний быв, смирен же и кроток и наставник добрый монашествующим в Горе Афонстей показался еси, Силуане, сего ради монаси и мирстии предстательству твоему пред Богом вверяются.

И ныне, богородичен: Покров буди, и предстательство, и заступление, и похвала, Дево, обнажену мне ныне всякия помощи, безпомощных сило и надеждо ненадеемых, Силуана молитвами, лучей солнечных теплейшими.

Ирмос: Из Отца прежде век рожденнаго Сына и Бога и последняя лета воплощеннаго от Девы Матере, священницы, пойте , людие, превозносите во вся веки.

Воздеяние рук наших приими, преподобне, Владычней благости подобяся, прегрешения наша презирая, Ты бо душу твою уязвил еси Христовою любовию и Пречистыя Его Матере, Еюже умоли спасти души наша.

Яко крин предивный и сапфир пречудный, в вертограде Пречистый процвел еси, преподобне Силуане, Владыце твоему Христу смиренно подражая, выше бо человека восприем житие, имже многих души Господу приводиши.

Воистину носитель даров Святаго Духа был еси и различными добродетельми украшен, Силуане, смирением горнюю высоту наследив, нищетою духовною. Небесное богатство изрядно приял еси. Наследники сего покажи нас молитвами твоими.

Слава: Сияния Божественнаго и Духа Святаго сладости причастника показа тя Господь, отче Силуане, егда в неизреченнем Фаворстем сиянии тя посетил есть. Зрети славу Сего - в свете блистания Божества Его сподоби и нас, молимтися.

И ныне, Богородичен: Пречистая Владычице, Небесных сил превышшая, рождшая Спаса, всех Содетеля, Единосущна Отцу и Духу, даждь нам слово, Препетая, яко да возможем пети Тя, сущую Заступницу рода нашего.

Ирмос: Тя паче ума и словесе Матерь Божию, в лето Безлетнаго неизреченно рождшую, вернии, единомудренно величаем.

В житии подвижника предивна, по смерти же молитвенника и сострадателя за нас пред Богом изрядна, познахом тя, преподобне, егда иеродиакона Давида, смертельно отравлена, посещением твоим внезапу исцелил еси, покаяния время сему исходатайствовав усердно.

Земли Российския сосуде избранный и Горы Афонския подвижниче новый, угодниче Божий Силуане, простри длани твоя за нас ко Господу и, яко миро благовонное, молитвы вознеси, да спасет от смерти души наша.

Ангелом единоправна и святым сопричастна к Горнему Сиону призва тя Господь, преподобне, идеже вознеси молитвы твоя за нас ко Владыце всех, ходатайствуя о Святей Церкви и о нас, чтущих память твою сладкопесненно.

Слава: Огнем купину не опалившим и пламенными языки Церковь Христову освятившим, Духом Святым возжжен был еси, смрения твоего ради, отче предивне, да житием нескверным научиши нас покланятися Троице, всех Богу, пламенем любве твоея к Нему приближающихся.

И ныне, Богородичен: Яко всех Царицу и Владычицу нашу, Тя любовию славим, Пречистая Дево, просвещшиися Страстьми Сына Твоего и познавшии Сего, всем Благодетеля. Слава благодати Его во вся веки.

Светилен, глас 4:

Света немеркнущаго блистанием украсился еси, преподобне отче наш Силуане, и предстоиши вечно Престолу славы Триединаго Божества, о Дусе Святем ликовствуяй. Благодати сея испроси и нам, да молитвами твоими причастницы жизни вечныя будем.

И ныне, Богородичен, глас тойже:

Осиянием Твоим просвети наша помышления, и сердца, и разум, Мати Безневестная, яко да стезями жизни право ходяще милость приобрящем, возвещающе присно хвалы Твоя.

На хвалитех стихиры святому на 4, глас 4:

Подобен: Дал еси знамение:

Любве Божия пламенный рачителю, / преподобне отче Силуане, и Духа Святаго усерднейший стяжателю, / Того же действием страсти душевныя в сердцы твоем, / яко на мельнице, измолол еси, / и сице хлеб ангельский вкусив, / питаеши и нас, икономе добрейший, / да причастницы жизни вечныя будем.

Кладязь новый, воды живыя преисполненный, / в Горе Афонстей источися: / слезы молитвы твоея, преподобне Силуане, / ихже, яко миро благоуханное, / у ног Господа нашего источал еси, / мертвым, живым и грядущим умилостивления прося. / Сия молитвы не лиши и нас, преподобне, / в мори житейстем грехми обуреваемых.

Образ смирения Христова и любве Его / житием твоим показал еси, преподобне, / слезно взывая: / Братие, любите враги ваша, / сии бо суть братия ваша, / враг же ваш - диавол есть, / сице бо средостение греха разрушается и злоухищрения диавола побеждаются, / и мир Божий в человецех водворяется, / творящии же сия не подвижатся в Правде Божией во веки.

Свещу, мрак греховный просвещающую, / показа тя Господь, боголюбиве Силуане, / да к тебе, человеколюбием изобилующу, / за томящихся во аде страдати желающу, / в надежде спасения припадающе, вопием: / слез твоих теченьми очисти прегрешения наша / и исцели души наша, / да не лишени будем любве Христовы, / егда явится в день Судный.

Слава, глас 6:

Приидите, вси Христу любовию утренююще, / да радости подвижника предивнаго причастницы будем: / ныне Ангели на Небесех / и человецы на земли радуются, / се бо Пречистая Матерь / от юдоли греховныя, / яко овча обретенное, / Силуана смирением украшена, / во двор овец Христовых приведе, / величие подвига веры его, / яко жертву непорочную, / во Святая Святых вознесе, / да видяще, како любит Господь верных Своих, / и мы Царствию Христову приобщимся.

И ныне, праздника.

Блаженны от канона святому, песнь 3-я и 6-я.

Прокимен, глас 7-й: Честна пред Господем смерть преподобных Его.

Стих: Что воздам Господеви о всех, яже воздаде ми?

Причастен: В память вечную будет праведник.